Ndima ńe nde diboa

Ndima ńe nde ebe̱yed’a moto nu si me̱ne̱. Nde ba yo̱ki pe̱ o kwala na moto e ndima yete̱na a si ma so̱ntane̱ mambo mō̱ to̱ ke̱ bede̱mo bao be diwengisan na ba jita la bato. Nika nde ba yo̱kino̱ o kwalane̱ moto ńa we̱ o ekomb’a eyidi o po̱ o mundi mupe̱pe̱ na e ndima. Njo̱m’a nika ńe nde na bede̱mo to̱ mabola mao be diwengisan na nje baje̱ o mundi a po̱ino̱ ba m’engane̱no̱ mo̱. Mulelem pe̱ na moto nu s’okwo kalati to̱ nu si ta o esukulu, yete̱na a si so̱ntane̱ lambo, ba yo̱ki o kwala na e ndima.

 <o:p></o:p>

« Ndima ńe nde diboa », mun munia mu ben betukwedi ńai iba : diboa di si ma po̱so̱ wonja to̱ mukom ; bato be̱̱se̱ bena ba kasea mo̱. O dine̱ je̱ne̱ pe̱, diboa la bo̱ yete̱na di kusi dibongo la bwam. Ońola nika mot’a ndima o mbad’a bede̱mo pe̱ e na a tukwa ye te̱ na a be̱n ńo̱ngi.<o:p></o:p>

Ponda bakala ba po̱ino̱ o bekombo basu ba Afrika, njo̱m ba tano̱ ba bola e ta nde na di ta ndima ońola nika nde, ka kwala labu, ba po̱ino̱ o tele̱ biso̱ miso̱, o lē̱ biso̱ muaye.<o:p></o:p>

Nika e ta nde e pula o kwala na o je̱ne̱ labu, longe̱ di tano̱ di be̱ne̱ kwaṅ di si ta po̱ mulemlem mwa dikala na labu. O miso̱ mabu di ta di dia ndima. Biana ekombo’asu e ma te̱me̱ wonja, jita lasu na basango basu di ta jo̱nge̱le̱ na ekombo’asu e te̱m te̱ wonja e me̱nde̱ pe̱ o po̱ mulemlem ma dikala ka bene̱ bekombo sepo̱̱n ka bekombo ba mbe̱ng’a bakala.<o:p></o:p>

Mańaka m’asu me nde na ombusa muane̱i ma mbu na lambo ben bekombo be te̱mno̱ wonja, o mulopo ná longe̱ lasu di tukwe ńai tue na ndenge̱ ba ma wo̱ye̱no̱, ba ma bata nde.<o:p></o:p>

O mulopo na ekombo’asu yale o boso, e ma bata nde o timba ombusa ońola ndima na ngolowake̱ ńa badie̱le̱ ekombo na mikwandedi mabu.<o:p></o:p>

Seto̱ bwam ba ekombo nde ba ma wasano̱ to ba ma boleano̱. Muse̱ṅ ba be̱nno̱ to̱ tombwane̱ labu o to̱ nje ba mukeano̱ nde ye babo̱ mweńa. O nika nde ndima ńeno̱ diboa di mabole̱ biso̱ mbo̱lo̱n na mbeu a ńolo.

<o:p></o:p> 

Ben betiledi be ma wéa nde biso̱  o Duala-Duala Oline Open Hub (Dooh)<o:p></o:p>

Ombwa mako̱m o musinga (liens)